Б.Номин: Эмээ болчхоод харамсахгүйн тулд миссийн тэмцээнд орохоор шийдсэн

Монгол хүн  гадаадад амжилттай яваа жишээ цөөнгүй бий. Бид энэ удаа Канад Улсад амьдардаг нэгэн Монгол эмэгтэйг онцолж ярилцлаа . Түүнийг Б.Номин гэдэг, одоо 35 нас хүрч буй. Тэрээр Miss Universe of Canada тэмцээнд оролцож байна.

Сайн байна уу. Та манай уншигчдад өөрийгөө танилцуулна уу.

-Намайг Номин гэдэг. Би канад улсын нийслэл Отава хотод ажиллаж амьдардаг. Канадын засгийн газарт эрүүл мэндийн яаманд ажилладаг. Мөн модель, жүжигчний ажил давхар хийдэг.  1999 онд 10 настайдаа эх орноосоо гарсан. Анх Америкт амьдардаг байсан. Ээж дүү хоёртойгоо амьдардаг. Англи, Франц, Испани хэлтэй.

Монголд байх үеийнхээ  дурсамжаас бидэнд хуваалцаач. Багадаа ямар хүүхэд байсан бэ?

-Монголд байхдаа 24-р сургуульд сурдаг байсан. Математикийн гүнзгий ангид сурдаг байсан болохоор хичээлээсээ ирээд шууд хичээлээ хийдэг хүүхэд байсан. Америкт очоод англи хэл сурсан. 13 настайдаа Америкийн ерөнхийлөгчийн онц сурлагатан хүүхэд шагналаар шагнуулж байсан. Нэг жилийн дотор гурван зуугаад ном уншаад шагнуулж байлаа.

Хамгийн анх кинонд тоглох мэдрэмж, сэтгэгдэл хэр байв? Ямар саад бэрхшээлүүд гарч байсан бэ?

-Анхны кинондоо жүжигчин мэргэжлийн ямар ч баримжаагүй тоглосон. Би Монгол хэлээр ярих ёстой байсан болохоор арай хялбар байсан. Киноны анхны өдрөө өглөөний долоогоос шөнийн арван цаг хүртэл нийт 15 цаг ажилласан. Анх очиход надад тусдаа хэсэг гаргаад өгсөн. Арын ажилчид нь надтай од хүнтэй харьцаж байгаа юм шиг хүндэтгэлтэй хандаж байсан нь үнэхээр гоё санагдсан. Алдартай, нэр хүндтэй жүжигчид нь бид нартай маш эелдэг, хүндэтгэлтэй хандаж байсан. Тухайн үед хүн ямар ч амжилт, алдарт хүрсэн ч хүнтэй хүн шиг найрсаг харьцах ямар гоё юм бэ гэж бодсон. Тэднээс суралцах зүйл маш их. Хамгийн сайн сурсан нь энэ байсан.

Таны тухай судалж байхад та 13 жилийн өмнө хийж чадаагүй зүйлээ одоо хийх боломж олдоо. Тиймээс Miss Universe of Canada тэмцээнд орж байна гэж нийтэлсэн байна. Тухайн үед юу болсон бэ?

-13 жилийн өмнө би сүлжээ дэлгүүрт ажилладаг байсан. Тухайн үед миний ажиллаж байсан дэлгүүрт энэ тэмцээний шалгаруулалт болсон. Надад орох боломж олдсон ч би залуу байсан болохоор санаа зовоод бас санхүүгийн асуудлаас болж больсон.

Энэ жил яагаад Miss Universe of Canada тэнцээнд орохоор болсон бэ? Танд юу нөлөөлөв?

-Miss Universe тэмцээн насны хязгааргүй болж, гэрлэсэн байна уу, хүүхэд төрүүлж үү гэх мэт шаардлага байхгүй болсон байсан. Үүнийг мэдээд надад дахин нэг боломж ирлээ гэдэг итгэл төрсөн. Гэхдээ анх санаа зовж байсан. Аль хэдийн гуч гарчихаад гоо сайхны тэмцээнд орох нь зохимжтой юу гэж бодсон.

Эмэгтэй хүнийг 30 нас хүрэх үед хүмүүс хөгширсөн, нас явсан гэж боддог. Үүнийг өөрчлөхийг хүссэн. Манай энэ тэмцээн 55 настай эмээ орж байгаа. Гурван ач хүүтэй эмээ орж байгааг хараад хүн хөгширдөггүй юм байна гэж бодсон.

Хоёрдугаарт : Ази тэр тусмаа Монгол бүсгүйчүүдэд үлгэр жишээ нь болж, Монголчууд хаана ч явсан хүчтэй байдаг гэдгийг харуулахыг хүссэн.

Гуравдугаарт өөртөө нэг төрлийн сорилт тавьж байгаа. Би өөрийгөө олон зүйлд сорьж үзэхийг хүсдэг. Урьд нь фитнес тэмцээнд орж, арван  өдрийн чимээгүй бясалгал хийж, мөстэй ванн дотор сууж сорьж үзсэн.

Урьд нь бодибилдингийн тэмцээнд ороод тавдугаар байранд орсон. Тухайн үед тайзан дээр бикинитэй алхаж үзсэн учир одоо санаа зовохгүй олон хүний өмнө алхаж чаддаг болсон. Тэр тэмцээнд намайг дасгалжуулсан хүн маань миний спонсор болоод намайг дасгалжуулж байгаа.

Мөн дараа нь эмээ болчхоод харамсах болов уу гэж өөрөөсөө асуусан. Тэгээд харамсах юм байна гэдгээ мэдээд орохоор шийдсэн.

Таны хувьд өөрийгөө сорьж байсан сорилтуудаас хамгийн хэцүү сорилт юу байсан бэ?

-Авран өдрийн чимээгүй бясалгал маш хэцүү байсан. Ярьж, хүн рүү харж, ном уншиж, мах идэж, дасгал хийж болохгүй. Би өөрөө үргэлж махтай хоол иддэг учраас мах идэж болохгүй гэдэг нь улам хүнд санагдаж байсан. Гэхдээ эхэлчихсэн байхад дасаад амархан болчихдог. Харин өдөрт арван цагийн турш суугаад бясалгал хийх хамгийн хэцүү байсан. Бие чилж, хатгуулж өвддөг. Явц дундаа эдгээр нь байхгүй болсон ч арван өдрөө дуусгаад өөрийн эрхгүй уйлдаг юм байна лээ. Хамт байсан хүмүүс маань бас үйлж байсан. Маш их тэвчээрийг гаргасны эцэст чадлаа гэж бодоод уйлсан.

Таныг хэд хэдэн ажил давхар хийж,  олон талаар өөрийгөө хөгжүүлж энэ амжилтад юу хамгийн  их нөлөөлсөн бэ?

-Миний хувьд Монголын сургалтын системийг маш сайн гэж боддог. Нэгээс гуравдугаар анги хүртлээ Монголд сурсан. Гуравдугаар ангидаа Монголд нэг сар суугаад Америкт ирсэн. Тухайн үед би Америкийн есдүгээр ангийн хүүхдийн бодлогыг бодож чаддаг байсан. Тиймээс Монголд байхдаа олж авсан суурь хүмүүжил маань их нөлөөлсөн гэж боддог. Мэдээж аав ээжийн дэмжлэг, америк багш нарын нөлөө байгаа.

Хүн байгаа юмандаа сэтгэл хангалуун байж, талархах хэрэгтэй. Мөн бусдаас өө хайж биш өөрөөсөө алдаагаа харж, өөрийгөө хөгжүүлэх нь маш чухал гэж боддог. Бас хүнийг байгаагаар нь хүлээж авах хэрэгтэй.  Эдгээр зүйлс надад нөлөөлсөн байх.

Залуу охид, амьдралд хөл тавьж байгаа бүсгүйчүүдэд юу гэж зөвлөх вэ?

-Өөрийгөө тултал хөгжүүл, таньж мэд. Юу хийхийг хүсэж байна бүгдийг нь хийж, сорьж үзэх хэрэгтэй. Миний хувьд өөрийгөө сайн таньж мэдээд, хөгжүүлж чадсаныхаа дараа гэр бүл зохиох нь зөв гэж боддог. Бас бусдыг хүлээн зөвшөөрдөг байх хэрэгтэй. Гучин нас хүрэхээс бүү ай. Харин өөрийгөө илүү мундаг сайн эмэгтэй болсонд талархах хэрэгтэй гэж зөвлөе.

Та бүхэнд энэхүү мундаг эмэгтэйд амжилт хүсэж санал өгөхийг хүсвэл энэхүү линкээр орж дэмжээрэй.

Б.Намуун