Улаанбаатар урлагийн наадам “Харж Буйдаа Итгэxүй” сэдвийн дор зоxион байгуулагдана

Монголын урлагийн зөвлөл (МУЗ) нь “Улаанбаатар” олон улсын медиа урлагийн наадмыг 9 дэх жилдээ “Харж буйдаа итгэхүй” сэдвийн дор 5-р сарын 07-ноос 19-нийг дуустал Монголын Уран Зургийн Галерей болон “Улаан гэр” галерейд зохион байгуулах гэж байна.

2016 оноос эхлэн жил бүр зохион байгуулагддаг энэхүү медиа урлагийн наадамд Монгол болон олон улсын 130-аад уран бүтээлч медиа бүтээлээ толилуулсан бол энэ жил Герман, Тайвань, Монгол, Словени, Франц, Америк, Испани улсын 14 уран бүтээлчийн медиа бүтээлүүд “Харж буйдаа итгэхүй” сэдвийн дор нэгдэж, ертөнцийг харах, мэдрэх, түүнтэй харилцах харилцаанд дижитал технологийн хөгжил хэрхэн нөлөөлж буйг бидэнд харуулах болно.

Хүмүүсийн өдөр тутмын харилцааны зайлшгүй нэг хэсэг болсон зураг нь бодит байдлыг дүрслэхээсээ хэтэрч хүмүүсийн үзэл бодол, төсөөлөл зэргийг харуулах болсон. Ийнхүү бидний амьдралын салшгүй хэсэг болсон зураг нь технологийн дэвшлийн тусламжтай хиймэл оюун ухаан, кодчилол, дижитал филтер, хүний нүүр царайг хуулбарлах зэрэг технологийг ашиглаж эхэлснээр бодит байдал, үүсмэл ертөнц хоёрын заагийг улам бүдгэрүүлсээр байна.

Энэ жилийн наадмын куратороор Инга Зайдлер ажиллаж байна. Тэрээр “Transmediale” медиа фестивалийн куратороор багагүй хугацаанд ажиллаж, Европын медиа урлагийн наадам (EMAF), Kasseler Dokfest баримтат кино, видео бүтээлийн наадам, Гёте институтийн хөтөлбөрүүдэд ажиллаж байсан туршлагатай нэгэн юм.

Наадмын хүрээнд технологид суурилсан, шинэлэг урлагийн бүтээлүүдийг үзэгчдэд хүргэхээс гадна уран бүтээлчдийн чадавхийг нэмэгдүүлэх, орчин үеийн урлагийн хөгжилд хувь нэмэр оруулах зорилгоор уулзалт, сургалт зохион байгуулж, тэдэнд мэргэжлийн ур чадвараа дээшлүүлэх, соёлын солилцоо хийх боломжийг олгодгоороо онцлог юм.

Үзэсгэлэн:

Монголын Уран Зургийн Галерей
Нээлтийн арга хэмжээ: 2024.05.07 /17:00-20:00/
Үзэсгэлэн: 2024.05.08-19 /9:00-17:30/

МУЗ-ийн дэргэдэх “Улаан гэр” галерей
Үзэсгэлэн: 2024.05.07-06.03 /10:00-18:00/

Сургалт:

Монголын Уран Зургийн Галерей:

2024.05.09-ний 12:00 цагт

Испанийн уран бүтээлч Ньевес дэ ла Фуэнте Гутьерресийн “Метаверст ертөнц бүтээх нь” сургалт

Лекц:

Монголын Уран Зургийн Галерей: 2024.05.14-ний 14:00 цагт

Фестивалийн куратор Инга Зайдлерийн “Дижитал орчин дахь кураторын оролцоо” лекц

Сургалт:

“Улаан гэр” галерей:

2024.05.11-ний 14:00 цагт

Тайванийн уран бүтээлч Ван Бо Янийн “Прожекшн маппинг” сургалт

Наадмын дэлгэрэнгүй мэдээллийг 11 319015 дугаар, UBIMAF фэйсбүүк хуудас болон [email protected] хаягаар авна уу.